Për herë të parë pas thuajse 3400 vitesh, kemi pamjen e vërtetë të Amenhotepit III, gjyshit të Tutankhamun-it dhe një nga faraonët më të suksesshëm të Egjiptit të lashtë.

I përshkruar si “një nga njerëzit më të pasur mbi dhe”, Amenhotep III udhëhoqi Egjiptin gjatë një periudhe prosperiteti dhe fuqie ndërkombëtare të paparë. Pavarësisht se ishte i njohur për statujat e tij, një rindërtim shkencor i fytyrës së tij nuk ishte bërë kurrë deri sot.

Duke përdorur të dhënat nga kafka e mumies së tij, një ekip shumëkombësh ka zbuluar ngjashmërinë e tij të vërtetë. Arkeologu Michael Habicht vuri në dukje se fytyra e tij e rindërtuar duket krejt ndryshe nga statujat. Pavarësisht famës së tij, shtati i vogël i Amenhotepit III (rreth 156 cm) është befasues, duke pasur parasysh përshkrimin e tij në art si një figurë më e madhe.

Cicero Moraes, një ekspert brazilian i grafikës, u mor me rindërtimin e fytyrës. Duke përdorur njohuri historike dhe të dhëna nga individë të gjallë, ata krijuan një pamje robuste për Amenhotepin III, duke pasqyruar indeksin e tij të mundshëm të masës trupore.

Amenhotep III u adhurua si hyjni gjatë jetës së tij dhe thoshte se perëndia Amun ishte babai i tij i vërtetë. Ai vdiq mes moshës 40 dhe 50 vjeçare, duke lënë një mbretëri në kulmin e fuqisë dhe pasurisë së saj.

Letrat diplomatike nga fuqitë e huaja i luteshin atij për ar, duke treguar pasurinë ekstreme të Egjiptit. Madje ka spekulime se mumia e Amenhotepit III ishte e mbuluar tërësisht me fletë ari.

Ai ishte gjithashtu i njohur për interesin e tij për gratë, duke importuar qindra gra të huaja për harem.

Pas vdekjes së tij, djali i tij, Amenhotep IV, u rebelua kundër priftërinjve Amun, duke ndryshuar emrin e tij në Akhenaten dhe duke e zhvendosur kryeqytetin në një qytet të ri duke nderuar perëndinë e diellit Aten. Tutankhamun, nipi i Amenhotepit III, më vonë ia riktheu rëndësinë  kultit të Amunit.

Varri i Tutankhamunit, i zbuluar në vitin 1922, e bëri atë një nga faraonët më të famshëm të historisë.

Dr. Habicht, z. Moraes dhe kolegët e tyre planifikojnë t’i publikojnë gjetjet e tyre në një revistë shkencore.